如何應付打斷對話的人？

一班人傾偈時，有時不免會出現一啲conversation killer，呢啲「殺手」一出聲，就會打斷大家嘅對話，或者令大家覺得好無癮。殺手有好多種，如果你遇上佢哋，應該點應付好呢？

盤問者──有啲人鍾意好似審犯咁盤問人，例如會問「你賺幾錢一個月？」、「你點解要咁做？」，佢哋唔會講自己嘅事，亦唔見得想加深對你嘅了解，只係想不斷問你、迫你埋牆角。

應付方法：對於佢嘅問題，只答一兩個字，例如「係」、「唔係」、「唔知」。咁樣佢就會覺得好無癮，自然會收聲。



誇大者──有啲人講嘢特別誇張，亦鍾意吹噓自己嘅事，令人覺得好討厭，佢哋成日會話：「我啱啱買咗個限量版手袋，靚唔靚？」、「我阿爸係邊個邊個」。

應付方法：如果在場有另一班人，就搵呢一班人傾偈，又或者係轉移話題，唔好俾佢有吹水嘅機會。



獨裁者──全場有佢講無人講，當其他人係佢嘅觀眾咁要聽佢「演講」，令人覺得好煩厭。

應付方法：向其他人發問問題，打斷佢嘅「演講」，總之唔好俾佢霸佔所有air time。