同情敵撞到正？淡定有錢淨！

兩女爭一男嘅故事成日聽到，可能你都曾經係故事主角之一，當你同情敵撞到正，你會點做？無論你係第三者，定係做俾人搶男友嘅一方，最緊要堅守第一誡條：淡定。

假如被情敵正面挑釁
同男友行行吓街，中途殺出另一位女生，聲稱係你男友嘅女友/情人，而你一直被蒙在鼓裏，無論你心裏面有幾晴天霹靂、驚惶失措都好，但你都要做好外在管理：
1. 保持鎮定。
2. 唔好只顧聽呢個失驚無神跳出來嘅陌生人講嘢，應該睇吓你身邊個男人講乜、有咩反應。
3. 當場攤牌、質問男友，都係最難睇同不智嘅行為，要忍住一時嘅衝動，對方以為你會大吵大鬧，你偏偏就唔做，咁已經打亂佢陣腳。
4. 表面上你要不動聲色，唔好俾對手從你嘅表情、身體語言中知道你諗乜。唔好同佢一般見識，越少說話對你越有利。先睇睇男友打算點處理，佢絕對有責任保護你，解決佢一手造成嘅爛攤子。
5. 當男友同你交代時，要平心靜氣，向男友大興問罪、講難聽嘅說話都無補於事，而且心裏有愧嘅係佢，你表現到成隻老虎乸咁，只會減少佢嘅罪惡感。反之，應該平心靜氣解決問題，再決定呢段感情嘅下一步應該點走。

假如發現男友有第三者
你喺街竟然見到男友同第二個女生一齊，你好想即場拆穿男友真面目、「捉姦在床」，但咁只會令自己顯得更可憐，對三個人都無好處。
1. 保持冷靜。
2. 睇清楚男友同呢個女生嘅舉動，搞清楚自己有無誤會咗。
3. 假如證實佢哋卿卿我我，大吵大鬧仍然係下下策，因為你自己都好混亂，亦未摸清男友個底，如果佢當場同你講分手，咪雙重打擊？所以不妨用一個唔會令大家難堪嘅方法等佢知穿咗煲，一來可以免得佢抵賴，話你認錯人之類，二來唔會搞到個局面太難睇。
4. 你可以即場打個電話俾佢，話佢知你見到佢同另一個女生一齊。然後請佢15分鐘後喺某處同你見面（15分鐘夠佢搵藉口離開情敵綽綽有餘）；如果佢唔肯嚟，證明呢個男人要嚟都無用，佢連呃你氹你都嫌多事。
5. 如果佢無接電話，就直接走到佢哋面前，然後遞張紙或直接同佢講：「15分鐘後喺xx見。」
6. 搵個安靜嘅地方，同男友好好溝通。請參看「假如被情敵正面挑釁」一段嘅第5點。

假如你發現自己係第三者
你同男友一齊，突然間出現一個女生，話自己先係「正印」，而你原來被蒙在鼓裏做咗「狐狸精」，無辜嘅你同時受到雙重打擊，一來被指「狐狸精」，二來原來自己一直被男友呃。
1. 依然係保持冷靜。
2. 向男友求證佢哋嘅關係。
3. 假如真係好似佢所講，原來你係第三者，盡量控制自己嘅情緒，所謂輸名份不輸陣。
4. 可輕輕表明立場，你都係啱啱先知道呢個事實，對方未必會相信，但並唔重要，最重要係你講咗出嚟，自己會覺得無咁委屈。
5. 唔使立刻離場，先靜觀其變，睇吓男友有乜反應。
6. 假如被情敵狠罵，唔好以牙還牙，將自己降grade，最好都係離開現場，留返俾佢哋單打獨鬥好了；不過你要交代男友幾時再搵你，清楚向你交代返成件事。